Notre site internet vient d'évoluer, notamment pour rendre plus claire la présentation des résultats des recherches (toujours plus abondants à mesure que nous ajoutons de nouveaux inventaires). Il est possible que ces résultats ne soient plus cliquables sur votre écran. Pour résoudre cette difficulté, il faut taper ctrl+maj+suppr pour accéder au menu permettant de vider le cache. Pour votre téléphone, ou si cela ne fonctionne pas, il suffit, pour trouver la procédure, de rechercher "vider le cache", suivi du nom de votre navigateur, sur votre moteur de recherche favori.
Document 4 - Terrier de la seigneurie de Saffres
1499, décembre. – Saffres
Terrier de la seigneurie de Saffres appartenant à Othenin de Cléron, seigneur de Cléron, Saffres et Hyz (-lès-Saffres, actuellement Roche-d'Y, comm. Massingy-lès-Vitteaux), reçu par les notaires Alexandre Croisier, de Flavigny, et Christophe Binet, de Vandenesse. Description du château.
Archives départementales de la Côte-d’Or, E 35, fol. 12-13
Declaracion des chastel, dongeon, basse court, pourpris et maison fort, aisances et appartenances d'icelluy chastel de Saffres appartenant a noble seigneur Othenin de Cleron, seigneur de Cleron, dudit Saffres et de Hyz en partie.
Et premierement
Est le dongeon, chastel et maison fort dudit Saffres, qui est tout alentour cloz de murs et pont leveiz. Et ouquel a ung corps de maison grant et spacieulx, de pierre, couvert de lasve et environnez d'eaue par devers le molin bannal dudit seigneur de Cleron, icelluy corps de maison contenant environ quatre estaiges. Ou a cellier dessoubz et une saule au dessus dudit celier. Et au dessus d'icelle saule est une belle et grande chanbre. Et dessus d'icelle chanbre sont les greniers. Et es deux boutz d'icelluy corps de maison et d'ung chacun d'iceulx sont deux chanbres et la boutillerie servant a icelles saule. Et, tenant icelluy corps de la maison, a une grosse tour ronde par devers souleil mussant. Et en laquelle tour sont [...]
[...] deulx chanbres voultees, garnies de chemynees, retraiz et barbacannes servans a la dite tour et chanbres, ensemble trois petites chanbrettes que sont par devers la cusine tenant a une petite tour dont on entre en ladite cusine, où a present par dessoubz ung celier qui souloit estre l'establerie des grans chevaulx dudit seigneur de Cleron et dudit Saffres.
Item, ladite cusine planchoiée de bois, couverte de lave, en laquelle sont deux chemynees, deux fours, l'ung grans et l'autre petit, et aussi, pour le garde maingié, ung petit retrait, et ung autre petit retrait pour mettre les ustancilles servant à ladite cusine, qu'est par devers ladite court et corps de maison. Et ledit garde maingié tenant d'une part a la court d'icelluy dongeon par devers la grosse tour quarree, et d'autre coustel es murs d'icelluy dongeon et petite court joingnant esdits murs de ladite fermetey.
Item, une court estant entre ledit corps de maison, sale et grosse tour [...]
[...] par devers midi, et d'ung bout tenant ledit corps de maison par devers souleil levant et, par devers la tour de Beaulregard, aux murs faisant la fermetey d'icelluy dongeon. Et aussy, par devers une vielle porte, est une petite chanbre et retrait a mettre et garder plusieurs fustailles et vesseaulx a mettre vin, et le tout ainsi comm'il se comporte, appert et selon les bondes y mises ja pieça. Et oultre ladite vielle porte et joingnant par devers ladite grosse tour, a une establerie en appentiz, de nouvel ediffice, a mettre trois chevaulx, tenant a la muraille de ladite vielle porte d'ung bout et, d'autre bout, aux murs de la cloison dudit dongeon et de costé la tour dudit pont levis.
Item, une petit tour quarree a l'endroit dudit pont leveiz faisant l'entree et hyssue dudit daugeon. Et ouquel pont leveiz sont baculez de chainnes de fer pendue, pour haulcer et abaisser ledit pont leveiz quant mestier est, ensemble la porte et guichet estans soubz ladite tour et fermans a l'encontre dudit pont leveiz. Et sur laquelle porte et en ladite tour a une chanbre a demeurance et ung petit garnie. [...]
[...] Item, une autre tour quarree moyenne, appellee Beaulregard, estans a trois estaiges, assise oudit dongeon par devers souleil levant et par devers les pontz levant et dormant. Dont, ou bas dedits estaiges, a ung puys et, par le dessoubz, ung celier. Et a par devers ledit puys une planche pour yssir et entrer par ladite tour oudit daugeon et en ladite basse court dudit chastel. Et laquelle planche l'on peust fermer a chainnes et avaler. Et, ou second estaige d'icelle tour et dessus ledit puys a une chanbre et chemynee, ensemble degrez de pierres et planche de bois pour y monter par la court dudit dongeon. Et oultre, dessus icelle chambre et ou troisieme estaige a une autre grant chanbre, en laquelle a semblablement chemynee et degrey de bois pour y monter. Et, au dessus d'icelle chanbre, a ung grenier faisant le darnier estaige d'icelle tour. Et, au joingnant d'icelle tour de Beaulregard et darniere chanbre, a une galerie neufve estant entre icelle tour et la tour dudit pont leveiz. Et, au bout d'icelles tours et pontz leveiz sont fossez qui envyronnent lesdites tours par dehors ledit daugeon. Et en iceulx fossez, par devers la basse court, sont deux terriers a mettre connis. Et avec ce, par devers ledit dongeon, a en icelle tour de Beaulregard, par bas, une entree pour entrer oudit celier estant en icelle tour.
A. Croisier C. Bynet