Notre site internet vient d'évoluer, notamment pour rendre plus claire la présentation des résultats des recherches (toujours plus abondants à mesure que nous ajoutons de nouveaux inventaires). Il est possible que ces résultats ne soient plus cliquables sur votre écran. Pour résoudre cette difficulté, il faut taper ctrl+maj+suppr pour accéder au menu permettant de vider le cache. Pour votre téléphone, ou si cela ne fonctionne pas, il suffit, pour trouver la procédure, de rechercher "vider le cache", suivi du nom de votre navigateur, sur votre moteur de recherche favori.
Document 13 - Philippe le Hardi concède ses armoiries à la ville de Dijon
22 septembre 1391
Archives départementales de la Côte-d’Or, B 11470
1. Phelippe, filz de Roy de France, duc de Bourgoingne, conte de Flandres,
2. d’Artois et de Bourgoingne, Palatin, sire de Salins, conte de Rethel
3. et seigneur de Malines. Savoir faisons a tous presens et advenir
4. que nous qui avons vraye congnoissance de la bonne loyaulté et
5. parfaicte amour que noz bien amez les habitans et commune de nostre
6. bonne ville de Dijon ont tousjours eu a nous, ont pour le present
7. et esperans que tousdiz auront, en consideracion aux bons services
8. et plaisirs que iceulx habitans et commune nous ont fais depuis que
9. nous venismes premiers a la seigneurie de nostre duchié de Bourgoigne
10. jusques a ores, voulans monstrer que nous avons congnoissance
11. des choses dessusdictes, et en donnant a eulx bonne voulenté de
12. tousjours mieulx faire pour plus honorer ladicte ville et les
13. habitans et commune d’icelle, a iceulx habitans et commune avons
14. octroyé, et par ces presentes octroyons que ès armes ou enseigne
15. de ladicte ville qui est ung escu de gueules tout plain, lesquelles
16. ilz ont accoustumé anciennement de porter, ilz puissent mectre
17. et porter perpetuellement en bataille et dehors, en tous les lieux
18. ou il leur plaira estre, mectre ou porter leursdictes armes
19. ou enseigne, ung chief de nos propres armes, au perpetuel
20. honneur et decorement d’icelles. Si donnons en mandement a
21. noz amez et feaulx mareschal et seneschal et a tous
22. nos autres justiciers et officiers, presens et advenir, et a leurs lieuxtenans,
23. que de nostre presente grace et octroy, lessent et seuffrent user
24. paisiblement lesdits habitans et commune. Car ainsi nous plaist il
25. estre fait et ausdits habitans et commune l’avons octroyé et
26. octroyons par ces presentes, de grace especial et de nostre certainne
27. science. Et que ce soit ferme chose a tousjours, nous avons fait
28. mectre nostre scel a ces lectres. Donné à Rouvre le XXIIe jour
29. du mois de septembre, l’an de grace mil trois cens quatrevins
30. et unze. Ainsi signé par Monseigneur le Duc. J. le Mol.
31. Extrait au vray original
32. par moy notaire soubscript.
33. [Signature : ] Gueneaut/Gueneant
Tousdiz = toujours